Martın 11-dən 14-dək BMT-nin İnsan Hüquqları üzrə Ali Komissarlığının Cenevrədəki qərargahında BMT-nin Əlilliyi olan Şəxslərin Hüquqları Haqqında Konvensiyasının 30-cu sessiyası keçirilib.
AZƏRTAC xəbər verir ki, sessiyada müxtəlif ölkələrdən olan dövlət orqanları və qeyri-hökumət təşkilatlarının nümayəndələri ilə yanaşı Azərbaycan Əlil Təşkilatları İttifaqı da iki nümayəndə ilə təmsil olunur.
Sessiyanın ilk günü Əlil Təşkilatları İttifaqının hazırladığı alternativ hesabatının təqdimatı olub. Təqdimatı Əlil Təşkilatları İttifaqının prezidenti Davud Rəhimli və Eşitmə və Nitq Məhdudiyyətli Şəxslərə Sosial Yardım İctimai Birliyinin sədri Cəmilə Abdulova ediblər.
Təqdimatdan sonra komitə üzvlərini maraqlandıran suallar cavablandırılıb. Sessiya zamanı Əlilliyi olan şəxslərin hüquqları haqqında Komitənin üzvləri və Azərbaycan üzrə məruzəçilərlə görüş keçirilib.