“Hemofiliya və talassemiya irsi qan xəstəlikləri olan şəxslərin sanatoriya-kurort müalicəsi ilə təmin edilməsi Qaydası”nın təsdiq edilməsi haqqında
AZƏRBAYCAN RESPUBLİKASININ NAZİRLƏR KABİNETİNİN QƏRARI
“Hemofiliya və talassemiya irsi qan xəstəliklərinə düçar olmuş şəxslərə dövlət qayğısı haqqında” Azərbaycan Respublikası Qanununun tətbiq edilməsi barədə» Azərbaycan Respublikası Prezidentinin 2005-ci il 18 iyul tarixli, 264 nömrəli Fərmanının 1.6-cı bəndinin icrasını təmin etmək məqsədi ilə Azərbaycan Respublikasının Nazirlər Kabineti qərara alır:
1. “Hemofiliya və talassemiya irsi qan xəstəlikləri olan şəxslərin sanatoriya-kurort müalicəsi ilə təmin edilməsi Qaydası” təsdiq edilsin (əlavə olunur).
2. Bu qərar imzalandığı gündən qüvvəyə minir.
Azərbaycan Respublikasının Baş naziri A. RASİZADƏ
Bakı şəhəri, 18 yanvar 2006-cı il
№ 17
Azərbaycan Respublikası Nazirlər Kabinetinin
2006-cı il 18 yanvar tarixli, 17 nömrəli qərarı ilə
TƏSDİQ EDİLMİŞDİR
Hemofiliya və talassemiya irsi qan xəstəlikləri olan şəxslərin sanatoriya-kurort
müalicəsi ilə təmin edilməsi
QAYDASI
1. Bu Qayda «Hemofiliya və talassemiya irsi qan xəstəliklərinə düçar olmuş şəxslərə dövlət qayğısı haqqında» Azərbaycan Respublikası Qanununun tətbiq edilməsi barədə» Azərbaycan Respublikası Prezidentinin 2005-ci il 18 iyul tarixli, 264 nömrəli Fərmanının 1.6-cı bəndinin icrasını təmin etmək məqsədi ilə hazırlanmışdır.
2. İrsi qan xəstəliyi olan şəxslər tibb müəssisələrinin göndərişi əsasında sanatoriya-kurort müalicəsi ilə təmin olunurlar.
3. Sanatoriya-kurort müalicəsinə tibbi göstərişləri olan hemofiliya və ya talassemiya irsi qan xəstəliklərinə düçar olmuş şəxslər üçün müalicə həkimi tərəfindən Azərbaycan Respublikası Səhiyyə Nazirliyinin təsdiq etdiyi xüsusi formalı sanatoriya-kurort kartası doldurulur (forma 072/u).
4. Hemofiliya və talassemiya irsi qan xəstəliklərinə düçar olmuş və əlillik dərəcəsinə malik olan şəxslər respublika hüdudları daxilində sanatoriya-kurort müalicəsi almaq üçün tibb müəssisəsi tərəfindən verilmiş sanatoriya-kurort kartasını və ərizələrini şəhər (rayon) əhalinin sosial müdafiəsi mərkəzlərinə, əlilliyi olmayan şəxslər isə səhiyyə orqanlarına təqdim etməklə, növbəlilik əsasında sanatoriya-kurort yollayışları ilə təmin olunurlar.
5. Yollayışları vermiş orqanlarda «geri qayıtma» talonunun qeydiyyatı aparılır və yollayışların istifadəsini təsdiq edən sənəd kimi saxlanılır.
6. Yollayışlar qiymətli sənəddir, pul vəsaiti ilə bərabər saxlanılmalı və uçota alınmalıdır.
7. Yollayışların mədaxil və məxaric sənədləri, müqavilələr, qaimə-fakturalar, hesabatlar, uçot kitabları və s. sənədlər qanunvericilikdə müəyyən edilmiş qaydada saxlanılır.