XƏBƏRLƏR
- 30/6/2022 Abşeron rayonunda yeni günərzi qayğı mərkəzi açıldı
Abşeron rayonunda yeni günərzi qayğı mərkəzi açıldı
Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi tərəfindən Abşeron rayonunda əlilliyi olan 5-18 yaşlı uşaqlar üçün yeni günərzi qayğı mərkəzi açılıb.
Mərkəzin açılışında Sosial Xidmətlər Agentliyinin sədri Vüqar Behbudov xüsusi qayğıya ehtiyacı olan şəxslərin zəruri sosial xidmətlərlə əhatə olunması üçün icra olunan sosial proqramların getdikcə genişləndiyini vurğulayıb. Qeyd olunub ki, hazırda Agentliyin müəssisələrində 600-dən çox uşağa müxtəlif sosial xidmətlər göstərilir.
Yeni günərzi qayğı mərkəzinin məqsədi də qeyd olunan kateqoriyadan olan uşaqların psixo-sosial reabilitasiyasına və cəmiyyətə inteqrasiyasına dəstək göstərilməsi, ailələrinin ehtiyac duyduqları sosial xidmətlərlə təmin edilməsidir.
Bu kimi tədbirlər həmin uşaqların dövlət uşaq müəssisələrinə düşməsinin qarşısının alınmasına da dəstək olur.
Agentliyin sağlamlıq imkanları məhdud uşaqlar üçün 2 saylı sosial xidmət müəssisəsinin (Abşeron rayonu, Saray qəsəbəsi, M.Ə.Sabir küçəsi, 17) nəzdində yaradılan mərkəzə qəbul olunan uşaqlar həftənin beş günü saat 9:00-dan 18:00-dək sosial-məişət, tibbi-sosial, sosial-psixoloji və sosial-pedaqoji xidmətlərlə təmin olunacaqlar.
Həmçinin valideynlərə uşaqlara qulluğun təkmilləşdirilməsi üçün məsləhət xidmətləri göstəriləcək, valideynlik səriştəliliyinin gücləndirilməsi üçün təlim proqramları təşkil olunacaq. Mərkəz bütün zəruri avadanlıqlarla təchiz olunub.
Mərkəzin göstərdiyi xidmətlərdən yararlanmaq istəyənlər Sosial Xidmətlər Agentliyinin yerli qurumlarına, “DOST” mərkəzlərinə ərizə ilə müraciət edə bilərlər. Həmçinin Agentliyin 116123 “Qayğı” Çağrı Mərkəzinə zəng edərək göstərilən sosial xidmətlərlə bağlı məlumat almaq mümkündür.
Əlil Təşkilatları İttifaqı
Bu xəbər 618 dəfə oxunub
1.jpg)
