XƏBƏRLƏR
- 18/7/2022 “QHT-lərin I İnkişaf və Mübadilə proqramı”nın təlimçiləri məlum oldu
Məlumat verdildiyi kimi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi qeyri-hökumət təşkilatlarının inkişafı, onların bilik və bacarıqlarının artırılması məqsədilə “QHT-lərin I İnkişaf və Mübadilə proqramı”na başlayır.
Sizi proqramın təlimçiləri ilə tanış edirik!
Dr. Anar Vəliyev - ADA Universitetinin dosentidir. O, Tarix üzrə həm bakalavr (2001), həm də magistr təhsilini (2003) Bakı Dövlət Universitetində qazanmışdır. 2001-2003-cü illər ərzində isə ABŞ-ın İndiana Bluminqton Universiteti, İctimai və Ətraf-Mühit Məsələləri İnstitutunda “İctimai Siyasət” ixtisası üzrə 2-ci magistr təhsilini almışdır. 2007-ci ildə ABŞ-ın Lyusvil Universitetinin Şəhər və İctimai İşlər İnstitutunda dissertasiyasını uğurla müdafiə edərək doktorluq dərəcəsi qazanmışdır. Dr. Anar Vəliyev 2007-2008-ci illər aralığında Çexiya Respublikasının Brno şəhərində yerləşən Masarik Universitetinin Sosial Elmlər fakültəsində baş müəllim olaraq çalışmışdır. 2008-ci ildə indiki ADA Universitetinə qoşulmuş və hazırda universitetin Beynəlxalq və İctimai Münasibətlər İnstitutunun dekanı vəzifəsində çalışmaqdadır. Onun təcrübə sahəsinə post-Sovet respublikalarının ictimai siyasəti, vətəndaş cəmiyyəti, demokratiya və idarəetmə, şəhər planlaması və inkişafı daxildir. Dr. Vəliyev Avrasiya Tərəfdaşlıq Fondu, Asiya İnkişaf Bankı, Dünya Bankı, BMT İnkişaf Proqramı, BMT Ərzaq və Kənd Təsərrüfatı təşkilatı və digərlərində müşavir olaraq çalışmışdır.
Vüsal Behbudov - həm Azərbaycanda, həm də Balkan və Aralıq dənizi ölkələri, Ukrayna, Rusiya, Türkiyə və ABŞ-da demokratik idarəçilik, sahibkarlığın inkişafı, seçkilər, insan hüquqları, münaqişələr və siyasi-iqtisadı inkişafa dair layihələrin idarə olunması, monitorinqi və qiymətləndirilməsini aparmışdır. 15 ildən çox müddət ərzində ATƏT, BP Xəzər regionu (Azerbaycan, Gürcüstan, Tükiyə), Avropa Şurası, BMT-nin İnkişaf Proqramında və digər Avropa İttifaqı və USAİD-nin maliyyələşdirdiyi layihələrdə çalışmış və sosial-iqtisadi inkişaf sahələri üzrə tövsiyələr hazırlamış, bacarıqların artırılması, monitorinq və texniki yardımla yanaşı demokratikləşmə və siyası inkişaf məsələləri üzrə məsləhətlər vermişdir. 2018-ci ildən etibarən, Vüsal Behbudov Avropa Komissiyasının beynəlxalq eksperti olaraq Azərbaycanda, Balkan və Aralıq dənizi ölkələrində, Ukraynada, Rusiyada və Türkiyədə 35-dən çox layihənin monitorinqi və qiymətləndirməsini həyata keçirmişdir.
Vüsal Behbudov Beynəlxalq Münasibətlər üzrə ABŞ-ın George Mason Universitetindən magistr elmi (MSc) dərəcəsi, eyni zamanda İctimai İdarəetmə (İctimai İqtisadiyyat) üzrə İngiltərənin London İqtisadiyyat və Siyası Elmlər Universitetindən (LSE) yüksək magistr dərəcəsi almışdır.
Əlil Təşkilatları İttifaqı
Bu xəbər 676 dəfə oxunub
1.jpg)
